achchha hai mulaqat ho kam kam use kahna

achchhā hai mulāqāt ho kam kam use kahnā

zaḳhmoñ se chipak jaate haiñ marham use kahnā

kuchh sadiyoñ purāne haiñ to kuchh sadiyoñ na.e haiñ

kuchh apne zamāne ke nahīñ ham use kahnā

duniyā meñ faqīroñ kī jagah hī nahīñ bantī

tasvīr meñ aatā nahīñ album use kahnā

ye us ko banāte hue mā'lūm thā mujh ko

ḳhāliq ko nigal jaatā hai resham use kahnā

vo bhiiḌ se haT kar kahīñ baiThā huā hogā

ik din to nikalnā thā mirā dam use kahnā

lāshoñ ko hamārī jo kafan dete nahīñ the

qabroñ pe chaḌhāte haiñ vo parcham use kahnā

'hāris' ye kitāboñ kā zamāna to nahīñ hai

logoñ pe utartā hai koī ġham use kahnā

achchha hai mulaqat ho kam kam use kahna

zaKHmon se chipak jate hain marham use kahna

kuchh sadiyon purane hain to kuchh sadiyon nae hain

kuchh apne zamane ke nahin hum use kahna

duniya mein faqiron ki jagah hi nahin banti

taswir mein aata nahin album use kahna

ye us ko banate hue ma'lum tha mujh ko

KHaliq ko nigal jata hai resham use kahna

wo bhiD se haT kar kahin baiTha hua hoga

ek din to nikalna tha mera dam use kahna

lashon ko hamari jo kafan dete nahin the

qabron pe chaDhate hain wo parcham use kahna

'haaris' ye kitabon ka zamana to nahin hai

logon pe utarta hai koi gham use kahna