mujhse ye mat puchho kya in aankhon ki bimari hai

mujh se ye mat pūchho kyā in āñkhoñ kī bīmārī hai

champe jaisī rangat vaalī vo ik sundar naarī hai

malmal kī saarī hai tan par hāthoñ meñ pichkārī hai

ham ne sunā hai us kī galī meñ holī kī tayyārī hai

us ke gulābī ruḳhsāroñ par phailī buuñd pasīne kī

yā kachnār ke dāman par ye os kī halkī dhārī hai

hoñToñ meñ sūraj baiThā hai raat utrī hai bāloñ meñ

āñkhoñ meñ gahrā kājal hai paaoñ meñ pāyal bhārī hai

yā ye samajh lo niiñd meñ hai ḳhush-bū kā koī chanchal jhoñkā

yā phir us kā jism ye samjho juuhī kī ik kyārī hai

chāñd sitāroñ meñ bhaTke haiñ sahrāoñ meñ guzārī hai

ham ne baḌī mushkil se yaaro tab ye zamīñ utārī hai

kal kī jānib dekheñ kaise ek baḌī dushvārī hai

aañkh uThānā sahl nahīñ hai sapnā itnā bhārī hai

is nīche ākāsh tale to sar bhī uThānā hai mushkil

aise meñ jī lenā bhī āsān nahīñ fankārī hai

mujh se ye mat puchho kya in aankhon ki bimari hai

champe jaisi rangat wali wo ek sundar nari hai

malmal ki sari hai tan par hathon mein pichkari hai

hum ne suna hai us ki gali mein holi ki tayyari hai

us ke gulabi ruKHsaron par phaili bund pasine ki

ya kachnar ke daman par ye os ki halki dhaari hai

honTon mein suraj baiTha hai raat utri hai baalon mein

aankhon mein gahra kajal hai paon mein payal bhaari hai

ya ye samajh lo nind mein hai KHush-bu ka koi chanchal jhonka

ya phir us ka jism ye samjho juhi ki ek kyari hai

chand sitaron mein bhaTke hain sahraon mein guzari hai

hum ne baDi mushkil se yaro tab ye zamin utari hai

kal ki jaanib dekhen kaise ek baDi dushwari hai

aankh uThana sahl nahin hai sapna itna bhaari hai

is niche aakash tale to sar bhi uThana hai mushkil

aise mein ji lena bhi aasan nahin fankari hai