zar na baKHsha na sahi chashm-e-guhar-bar sahi

zar na baḳhshā na sahī chashm-e-guhar-bār sahī

'ishq pyārā hai bahut qalb kā āzār sahī

kuchh na kuchh ghar meñ asāsa mire maujūd to hai

daulat-e-dahr nahīñ daulat-e-afkār sahī

ġham-o-andoh-e-masā.ib se bharī hai duniyā

mujhe pyārī nazar aatī hai sitam-gār sahī

jashn-e-dīvālī manā lete haiñ har shab jugnū

qaid-ḳhāne meñ siyāhī ke giraftār sahī

tirā vahshī tire kūche meñ yahī kahtā thā

sāya-e-zulf nahīñ sāya-e-dīvār sahī

bazm-e-fankār meñ aayā pa.e-tauqīr koī

rahbar-e-shahr nahīñ gaañv kā sardār sahī

koī 'ālam ho magar hañs ke jiye jaate haiñ

vādī-e-gul na sahī vādī-e-pur-ḳhār sahī

is mohabbat ne diyā hausla dil ko mere

raah āsāñ na sahī manzil-e-dushvār sahī

baḌī ummīd hai allāh se baḳhshish kī hameñ

ham zamāne kī nigāhoñ meñ gunah-gār sahī

muflisī qaid kiye hai magar hasrat hai 'zafar'

ik nazar dekh to leñ raunaq-e-bāzār sahī

zar na baKHsha na sahi chashm-e-guhar-bar sahi

'ishq pyara hai bahut qalb ka aazar sahi

kuchh na kuchh ghar mein asasa mere maujud to hai

daulat-e-dahr nahin daulat-e-afkar sahi

gham-o-andoh-e-masaib se bhari hai duniya

mujhe pyari nazar aati hai sitam-gar sahi

jashn-e-diwali mana lete hain har shab jugnu

qaid-KHane mein siyahi ke giraftar sahi

tera wahshi tere kuche mein yahi kahta tha

saya-e-zulf nahin saya-e-diwar sahi

bazm-e-fankar mein aaya pae-tauqir koi

rahbar-e-shahr nahin ganw ka sardar sahi

koi 'alam ho magar hans ke jiye jate hain

wadi-e-gul na sahi wadi-e-pur-KHar sahi

is mohabbat ne diya hausla dil ko mere

rah aasan na sahi manzil-e-dushwar sahi

baDi ummid hai allah se baKHshish ki hamein

hum zamane ki nigahon mein gunah-gar sahi

muflisi qaid kiye hai magar hasrat hai 'zafar'

ek nazar dekh to len raunaq-e-bazar sahi