rahnuma koi na koi naqsh-e-pa le jaega

rahnumā koī na koī naqsh-e-pā le jā.egā

manzil-e-maqsūd tak ḳhud hausla le jā.egā

jo musāfir hai use kyā dhuup kī shiddat kā ġham

sar pe saa.e ke liye maañ kī du'ā le jā.egā

sang-bārī mashġhala jin kā hai un ke shahr meñ

kaise koī ā.ina-gar aa.ina le jā.egā

shahr-e-amrāz-o-balā kā dekhnā ye bhī tazād

chāragar bīmār se aa kar davā le jā.egā

us kī chālākī se shāyad aap vāqif hī nahīñ

vo bashar āñkhoñ se kājal tak churā le jā.egā

rāhat-e-jāñ jis ko tum 'kāvish' samajhte ho vahī

shab kī āsā.ish sukūñ din kā churā le jā.egā

rahnuma koi na koi naqsh-e-pa le jaega

manzil-e-maqsud tak KHud hausla le jaega

jo musafir hai use kya dhup ki shiddat ka gham

sar pe sae ke liye man ki du'a le jaega

sang-bari mashghala jin ka hai un ke shahr mein

kaise koi aaina-gar aaina le jaega

shahr-e-amraaz-o-bala ka dekhna ye bhi tazad

chaaragar bimar se aa kar dawa le jaega

us ki chaalaki se shayad aap waqif hi nahin

wo bashar aankhon se kajal tak chura le jaega

rahat-e-jaan jis ko tum 'kawish' samajhte ho wahi

shab ki aasaish sukun din ka chura le jaega