na kisi dar se lipaTta na chimaT jata hun

na kisī dar se lipaTtā na chimaT jaatā huuñ

sard-mehrī zarā dekhūñ to palaT jaatā huuñ

shā'irī saath chalī aatī hai darvāze tak

aa ke daftar meñ har ik chiiz se kaT jaatā huuñ

baa'z auqāt zamīñ tang sī lagtī hai mujhe

baa'z auqāt kisī dil meñ simaT jaatā huuñ

aisā bādal huuñ ki ik pal meñ añdherā kar duuñ

itnā halkā huuñ ki ik saañs se chhaT jaatā huuñ

us ne showcase ke uupar mujhe rakkhā huā hai

aane vāloñ kī 'ināyāt se aT jaatā huuñ

ai zamīñ log falak-bos mujhe jānte haiñ

jab tirī had se nikaltā huuñ to ghaT jaatā huuñ

maañ ke siine kī tarah ab mujhe tanhā.ī hai

koī aahaT bhī sunūñ us se chimaT jaatā huuñ

zindagī merī hai aur merī hifāzat meñ hai

aap kahte haiñ to maiñ raah se haT jaatā huuñ

isī mushkil meñ 'zahīr' ab mujhe āsānī hai

maiñ hamesha se zamāne ke ulaT jaatā huuñ

na kisi dar se lipaTta na chimaT jata hun

sard-mehri zara dekhun to palaT jata hun

sha'iri sath chali aati hai darwaze tak

aa ke daftar mein har ek chiz se kaT jata hun

ba'z auqat zamin tang si lagti hai mujhe

ba'z auqat kisi dil mein simaT jata hun

aisa baadal hun ki ek pal mein andhera kar dun

itna halka hun ki ek sans se chhaT jata hun

us ne showcase ke upar mujhe rakkha hua hai

aane walon ki 'inayat se aT jata hun

ai zamin log falak-bos mujhe jaante hain

jab teri had se nikalta hun to ghaT jata hun

man ke sine ki tarah ab mujhe tanhai hai

koi aahaT bhi sunun us se chimaT jata hun

zindagi meri hai aur meri hifazat mein hai

aap kahte hain to main rah se haT jata hun

isi mushkil mein 'zahir' ab mujhe aasani hai

main hamesha se zamane ke ulaT jata hun