meri wirasat mein jo bhi kuchh hai wo sab isi dahr ke liye hai

mirī virāsat meñ jo bhī kuchh hai vo sab isī dahr ke liye hai

ye rañg ik ḳhvāb ke liye hai ye aag ik shahr ke liye hai

agar isī raat kī siyāhī ke saath kho jā.eñge sitāre

to phir ye mere lahū kā raushan charāġh kis lahr ke liye hai

tulū-e-imkān-e-ārzū par yaqīn rakhtī hai ek duniyā

magar ye be-kār ḳhvāhishoñ kī numūd ik zahr ke liye hai

kanār-e-dariyā hai ek maddham ġhubār kis dasht kā paḌāv

darūn-e-sahrā ye āb-e-haivāñ kā naqsh kis nahr ke liye hai

ye ḳhvāb hote hue sahīfoñ ke phuul mere liye haiñ lekin

zamīn-e-dil par ye āyatoñ kā nuzūl ik dahr ke liye hai

bas ek insān kī ḳhushī hai kisī haqīqat kī rū-numā.ī

magar kisī ḳhvāb ke ziyāñ kā malāl ik shahr ke liye hai

agar hai insān kā muqaddar ḳhud apnī miTTī kā rizq honā

to phir zamīñ par ye āsmāñ kā vajūd kis qahr ke liye hai

meri wirasat mein jo bhi kuchh hai wo sab isi dahr ke liye hai

ye rang ek KHwab ke liye hai ye aag ek shahr ke liye hai

agar isi raat ki siyahi ke sath kho jaenge sitare

to phir ye mere lahu ka raushan charagh kis lahr ke liye hai

tulu-e-imkan-e-arzu par yaqin rakhti hai ek duniya

magar ye be-kar KHwahishon ki numud ek zahr ke liye hai

kanar-e-dariya hai ek maddham ghubar kis dasht ka paDaw

darun-e-sahra ye aab-e-haiwan ka naqsh kis nahr ke liye hai

ye KHwab hote hue sahifon ke phul mere liye hain lekin

zamin-e-dil par ye aayaton ka nuzul ek dahr ke liye hai

bas ek insan ki KHushi hai kisi haqiqat ki ru-numai

magar kisi KHwab ke ziyan ka malal ek shahr ke liye hai

agar hai insan ka muqaddar KHud apni miTTi ka rizq hona

to phir zamin par ye aasman ka wajud kis qahr ke liye hai