zikr-e-mazi go bhula baiThe hain apne dil se hum

zikr-e-māzī go bhulā baiThe haiñ apne dil se ham

haañ magar ġhāfil nahīñ haiñ fikr-e-mustaqbil se ham

baḳht-e-bad kī nā-rasā.ī kā gila kyā kījiye

kārvāñ manzil pe hai aur duur haiñ manzil se ham

yā lage miTTī Thikāne yā huuñ pāmāl-e-jafā

ab kahāñ jaa.eñ nikal kar kūcha-e-qātil se ham

allah allah in butoñ kī kaj-adā.ī dekhiye

be-vafā samjheñ hameñ go laakh chāheñ dil se ham

dekhiye mahshar meñ kyūñ-kar tai ho rāh-e-pul-sirāt

qabr tak mar mar ke pahuñche haiñ baḌī mushkil se ham

zaḳhm khā khā kar taḌapne tilmilāne kā maza

ḳhud hī ham 'bismil' haiñ kyā pūchheñ kisī 'bismil' se ham

zikr-e-mazi go bhula baiThe hain apne dil se hum

han magar ghafil nahin hain fikr-e-mustaqbil se hum

baKHt-e-bad ki na-rasai ka gila kya kijiye

karwan manzil pe hai aur dur hain manzil se hum

ya lage miTTi Thikane ya hun pamal-e-jafa

ab kahan jaen nikal kar kucha-e-qatil se hum

allah allah in buton ki kaj-adai dekhiye

be-wafa samjhen hamein go lakh chahen dil se hum

dekhiye mahshar mein kyun-kar tai ho rah-e-pul-siraat

qabr tak mar mar ke pahunche hain baDi mushkil se hum

zaKHm kha kha kar taDapne tilmilane ka maza

KHud hi hum 'bismil' hain kya puchhen kisi 'bismil' se hum