zamin mile na mile aasman mil jae

zamīñ mile na mile āsmān mil jaa.e

kahīñ qayām ho koī jahān mil jaa.e

vo bastī yaad kahāñ hai jahāñ sukūnat thī

kabhī to ḳhvāb meñ us kā jahān mil jaa.e

koī raqīb parinde meñ Dhaal de mujh ko

amaan chāhiye tote meñ jaan mil jaa.e

sitāra ban ke kabhī ḳhvāb meñ chamak uTThūñ

isī bahāne mujhe āsmān mil jaa.e

use ġhurūr ki rahtā hai āftāboñ meñ

falak ko zer karūñ vo uḌaan mil jaa.e

panāh mil sake mujh ko dayār-e-māzī meñ

qadīm shahr kī koī zabān mil jaa.e

zamin mile na mile aasman mil jae

kahin qayam ho koi jahan mil jae

wo basti yaad kahan hai jahan sukunat thi

kabhi to KHwab mein us ka jahan mil jae

koi raqib parinde mein Dhaal de mujh ko

aman chahiye tote mein jaan mil jae

sitara ban ke kabhi KHwab mein chamak uTThun

isi bahane mujhe aasman mil jae

use ghurur ki rahta hai aaftabon mein

falak ko zer karun wo uDan mil jae

panah mil sake mujh ko dayar-e-mazi mein

qadim shahr ki koi zaban mil jae