ab aise chaak par kuza-gari hoti nahin thi

ab aise chaak par kūza-garī hotī nahīñ thī

kabhī hotī thī miTTī aur kabhī hotī nahīñ thī

bahut pahle se afsurda chale aate haiñ ham to

bahut pahle ki jab afsurdagī hotī nahīñ thī

hameñ in hāloñ honā bhī koī āsān thā kyā

mohabbat ek thī aur ek bhī hotī nahīñ thī

diyā pahuñchā nahīñ thā aag pahuñchī thī gharoñ tak

phir aisī aag jis se raushnī hotī nahīñ thī

nikal jaate the sar par be-sar-o-sāmānī laade

bharī lagtī thī gaThrī aur bharī hotī nahīñ thī

hameñ ye ishq tab se hai ki jab din ban rahā thā

shab-e-hijrāñ jab itnī sarsarī hotī nahīñ thī

hameñ jā jā ke kahnā paḌtā thā ham haiñ yahīñ haiñ

ki jab maujūdgī maujūdgī hotī nahīñ thī

bahut takrār rahtī thī bhare ghar meñ kisī se

jo shai darkār hotī thī vahī hotī nahīñ thī

tumhī ko ham basar karte the aur din māpte the

hamārā vaqt achchhā thā ghaḌī hotī nahīñ thī

ab aise chaak par kuza-gari hoti nahin thi

kabhi hoti thi miTTi aur kabhi hoti nahin thi

bahut pahle se afsurda chale aate hain hum to

bahut pahle ki jab afsurdagi hoti nahin thi

hamein in haalon hona bhi koi aasan tha kya

mohabbat ek thi aur ek bhi hoti nahin thi

diya pahuncha nahin tha aag pahunchi thi gharon tak

phir aisi aag jis se raushni hoti nahin thi

nikal jate the sar par be-sar-o-samani lade

bhari lagti thi gaThri aur bhari hoti nahin thi

hamein ye ishq tab se hai ki jab din ban raha tha

shab-e-hijran jab itni sarsari hoti nahin thi

hamein ja ja ke kahna paDta tha hum hain yahin hain

ki jab maujudgi maujudgi hoti nahin thi

bahut takrar rahti thi bhare ghar mein kisi se

jo shai darkar hoti thi wahi hoti nahin thi

tumhi ko hum basar karte the aur din mapte the

hamara waqt achchha tha ghaDi hoti nahin thi