talluq ko nibhana bhi mujhe dushwar lagta hai

ta'alluq ko nibhānā bhī mujhe dushvār lagtā hai

kisī ko ab manānā bhī mujhe dushvār lagtā hai

baḌe hī bhed dil meñ the zabāñ chup thī magar ab to

haqīqat ko chhupānā bhī mujhe dushvār lagtā hai

zarā sī baat par ronā mire bachpan kī 'ādat thī

ki ḳhud ko ab rulānā bhī mujhe dushvār lagtā hai

ġhamoñ ne aan gherā hai tabī'at chup sī rahtī hai

kisī ko ab hañsānā bhī mujhe dushvār lagtā hai

manā letā thā jin rishtoñ ko āsānī se bachpan meñ

unhī ko ab manānā bhī mujhe dushvār lagtā hai

tabī'at aaj barham thī jo thā mumkin vo keh Daalā

sabhī bāteñ batānā bhī mujhe dushvār lagtā hai

ġhazal jo keh rahā huuñ maiñ ye merī āp-bītī hai

ise 'qaisar' sunānā bhī mujhe dushvār lagtā hai

ta'alluq ko nibhana bhi mujhe dushwar lagta hai

kisi ko ab manana bhi mujhe dushwar lagta hai

baDe hi bhed dil mein the zaban chup thi magar ab to

haqiqat ko chhupana bhi mujhe dushwar lagta hai

zara si baat par rona mere bachpan ki 'adat thi

ki KHud ko ab rulana bhi mujhe dushwar lagta hai

ghamon ne aan ghera hai tabi'at chup si rahti hai

kisi ko ab hansana bhi mujhe dushwar lagta hai

mana leta tha jin rishton ko aasani se bachpan mein

unhi ko ab manana bhi mujhe dushwar lagta hai

tabi'at aaj barham thi jo tha mumkin wo keh Dala

sabhi baaten batana bhi mujhe dushwar lagta hai

ghazal jo keh raha hun main ye meri aap-biti hai

ise 'qaisar' sunana bhi mujhe dushwar lagta hai