mazi ko bura kahte hain hum log ajab hain

maazī ko burā kahte haiñ ham log 'ajab haiñ

pahle bhī to hālāt yahī the ki jo ab haiñ

hai zo'm ki shīsha koī mahfūz nahīñ hai

patthar bhī mire daur ke ab dād-talab haiñ

ab maiñ hī sahī koī to shab jaag ke kaaTe

jo jāgne vaale the vo sab ġharq-e-tarab haiñ

ik nuuh nahīñ jo hameñ kashtī pe biThā le

varna kisī tūfān ke āsār to sab haiñ

taare jo numā.inda-e-ḳhurshīd the shab ko

ab sub.h kī zad par vahī vāmāñda-e-shab haiñ

kyā bhar gaye vo zaḳhm-e-hazīmat jo lage the

hañsne ke javāz ab ke bahut ġhaur-talab haiñ

jis shāḳh pe baiThe hoñ usī shāḳh ko kāTeñ

ham log hī ḳhud apnī tabāhī kā sabab haiñ

mazi ko bura kahte hain hum log 'ajab hain

pahle bhi to haalat yahi the ki jo ab hain

hai zo'm ki shisha koi mahfuz nahin hai

patthar bhi mere daur ke ab dad-talab hain

ab main hi sahi koi to shab jag ke kaTe

jo jagne wale the wo sab gharq-e-tarab hain

ek nuh nahin jo hamein kashti pe biTha le

warna kisi tufan ke aasar to sab hain

tare jo numainda-e-KHurshid the shab ko

ab subh ki zad par wahi wamanda-e-shab hain

kya bhar gaye wo zaKHm-e-hazimat jo lage the

hansne ke jawaz ab ke bahut ghaur-talab hain

jis shaKH pe baiThe hon usi shaKH ko kaTen

hum log hi KHud apni tabahi ka sabab hain