zindagi KHub samajhta hun ishaare tere

zindagī ḳhuub samajhtā huuñ ishāre tere

jāntā huuñ ki kidhar jaate haiñ dhāre tere

ho ga.e ġharq sab āñkhoñ se utāre tere

maut un ko bhī milī jo the ubāre tere

roz kitnoñ ko hī miTTī meñ milā dete haiñ

āsmāñ phir bhī chamakte haiñ sitāre tere

kashtī-e-jism pe chaḌhtā nahīñ hai dobāra

ik daf'a jo bhī utartā hai kināre tere

zindagī is meñ hī bikhrā hai mirā shīrāza

maiñ ne tā-'umr faqat gesū sañvāre tere

ai ḳhudā tū ne lagāyā hai ye bāzār-e-dahr

ham bashar hī ko uThāne haiñ ḳhasāre tere

jitne dil-soz haiñ qudrat ye havādis tere

utne dil-kash to nahīñ haiñ ye nazāre tere

is kā ehsān maiñ 'mar kar hī chukā pā.ūñgā

zindagī maiñ ne bahut lamhe guzāre tere

tū jo hai ātish-e-ḳhāmosh samajh le 'sāhil'

ThanDe paḌ jā.eñge ik roz sharāre tere

zindagi KHub samajhta hun ishaare tere

jaanta hun ki kidhar jate hain dhaare tere

ho gae gharq sab aankhon se utare tere

maut un ko bhi mili jo the ubare tere

roz kitnon ko hi miTTi mein mila dete hain

aasman phir bhi chamakte hain sitare tere

kashti-e-jism pe chaDhta nahin hai dobara

ek daf'a jo bhi utarta hai kinare tere

zindagi is mein hi bikhra hai mera shiraaza

main ne ta-'umr faqat gesu sanware tere

ai KHuda tu ne lagaya hai ye bazar-e-dahr

hum bashar hi ko uThane hain KHasare tere

jitne dil-soz hain qudrat ye hawadis tere

utne dil-kash to nahin hain ye nazare tere

is ka ehsan main 'mar kar hi chuka paunga

zindagi main ne bahut lamhe guzare tere

tu jo hai aatish-e-KHamosh samajh le 'sahil'

ThanDe paD jaenge ek roz sharare tere