maut jis waqt dhyan mein aai

maut jis vaqt dhyān meñ aa.ī

zindagī darmiyān meñ aa.ī

yuuñ tamannā hai ḳhush mire dil meñ

jaise apne makān meñ aa.ī

sang-e-rah ban gayā ḳhayāl-safar

baat kaisī gumān meñ aa.ī

kaam aayā na muddatoñ kā sulūk

dil meñ ranjish ik aan meñ aa.ī

zindagī kauḌiyoñ ke mol bikī

jab bhī ūñchī dukān meñ aa.ī

dar-o-dīvār tilmilāne lage

dhuup aisī makān meñ aa.ī

vo nazar aap hī payām banī

aap hī darmiyān meñ aa.ī

dil kī har baat ban ga.ī aañsū

kyā ravānī bayān meñ aa.ī

tere jaate hī kyā huā dil ko

phir na āvāz kaan meñ aa.ī

jaan le kar bhī koī ḳhush na huā

kyā kamī imtihān meñ aa.ī

baat kuchh aur us kā matlab kuchh

dil kī laġhzish zabān meñ aa.ī

dil kī dīvār gir ga.ī shāyad

apnī āvāz kaan meñ aa.ī

kisī qisse meñ bhī vo baat nahīñ

jo tumhāre bayān meñ aa.ī

baiThe baiThe taḌap uThe 'bāqī'

kaun sī baat dhyān meñ aa.ī

maut jis waqt dhyan mein aai

zindagi darmiyan mein aai

yun tamanna hai KHush mere dil mein

jaise apne makan mein aai

sang-e-rah ban gaya KHayal-safar

baat kaisi guman mein aai

kaam aaya na muddaton ka suluk

dil mein ranjish ek aan mein aai

zindagi kauDiyon ke mol biki

jab bhi unchi dukan mein aai

dar-o-diwar tilmilane lage

dhup aisi makan mein aai

wo nazar aap hi payam bani

aap hi darmiyan mein aai

dil ki har baat ban gai aansu

kya rawani bayan mein aai

tere jate hi kya hua dil ko

phir na aawaz kan mein aai

jaan le kar bhi koi KHush na hua

kya kami imtihan mein aai

baat kuchh aur us ka matlab kuchh

dil ki laghzish zaban mein aai

dil ki diwar gir gai shayad

apni aawaz kan mein aai

kisi qisse mein bhi wo baat nahin

jo tumhaare bayan mein aai

baiThe baiThe taDap uThe 'baqi'

kaun si baat dhyan mein aai