mariz-e-hijr masiha se bhi sanbhal na saka

marīz-e-hijr masīhā se bhī sañbhal na sakā

kisī kā zor muqaddar ke aage chal na sakā

faroġh-e-gor-e-ġharībāñ kī hai sabā dushman

charāġh-e-qabr ghaḌī do ghaḌī bhī jal na sakā

thakā huā thā bahut is liye lahad meñ mujhe

vo niiñd aa.ī ki karvaT koī badal na sakā

vo kyā kisī ke muqaddar kā bal nikāleñge

ki jin ke hāthoñ se gesū kā bal nikal na sakā

ġham-e-firāq se mar kar huī subuk-doshī

ye bojh vo thā jo tā-zīst sar se Tal na sakā

hazāroñ kaT gaye qātil kī is nazākat par

uThāyā haath se ḳhanjar magar sañbhal na sakā

nikalne paayā na qātil kā hausla 'bismil'

vo saḳht-jāñ huuñ ki ḳhanjar gale pe chal na sakā

mariz-e-hijr masiha se bhi sanbhal na saka

kisi ka zor muqaddar ke aage chal na saka

farogh-e-gor-e-ghariban ki hai saba dushman

charagh-e-qabr ghaDi do ghaDi bhi jal na saka

thaka hua tha bahut is liye lahad mein mujhe

wo nind aai ki karwaT koi badal na saka

wo kya kisi ke muqaddar ka bal nikalenge

ki jin ke hathon se gesu ka bal nikal na saka

gham-e-firaq se mar kar hui subuk-doshi

ye bojh wo tha jo ta-zist sar se Tal na saka

hazaron kaT gaye qatil ki is nazakat par

uThaya hath se KHanjar magar sanbhal na saka

nikalne paya na qatil ka hausla 'bismil'

wo saKHt-jaan hun ki KHanjar gale pe chal na saka