mausam-e-gulzar-e-hasti in dinon kya hai na puchh

mausam-e-gulzār-e-hastī in dinoñ kyā hai na pūchh

tū ne jo dekhā sunā kyā maiñ ne dekhā hai na pūchh

haath zaḳhmī haiñ to palkoñ se gul-e-manzar uThā

phuul tere haiñ na mere baaġh kis kā hai na pūchh

raat añdherī hai to apne dhyān kī mash'al jalā

qāfile vāloñ meñ kis ko kis kī parvā hai na pūchh

jo tirā mahram milā us ko na thī apnī ḳhabar

shahr meñ terā patā kis kis se pūchhā hai na pūchh

yuuñ to jitne phuul se chehre haiñ kumhlā jā.eñge

in bharī ābādiyoñ meñ kaun tanhā hai na pūchh

mausam-e-gulzar-e-hasti in dinon kya hai na puchh

tu ne jo dekha suna kya main ne dekha hai na puchh

hath zaKHmi hain to palkon se gul-e-manzar uTha

phul tere hain na mere bagh kis ka hai na puchh

raat andheri hai to apne dhyan ki mash'al jala

qafile walon mein kis ko kis ki parwa hai na puchh

jo tera mahram mila us ko na thi apni KHabar

shahr mein tera pata kis kis se puchha hai na puchh

yun to jitne phul se chehre hain kumhla jaenge

in bhari aabaadiyon mein kaun tanha hai na puchh