jo sar-e-nigah-e-yaqin tha wo ghubar-e-rah chhaTa nahin

jo sar-e-nigāh-e-yaqīn thā vo ġhubār-e-rāh chhaTā nahīñ

vo jo sang-e-vahm thā moḌ par vahī rāste se haTā nahīñ

maiñ nikal sakā nahīñ aaj tak tire mausamoñ kī girift se

jise apne aap pe zo'm thā rah-e-ibtilā meñ DaTā nahīñ

ye jo dostī ke haiñ silsile ye barā-e-nām haiñ chal rahe

mire haal par jo baras paḌe kisī aañkh meñ vo ghaTā nahīñ

vo jo shakl 'aam sī shakl thī mujhe yaad rah ga.ī kis tarah

mire hāfize meñ hai kis liye vo jo naam maiñ ne raTā nahīñ

tirā naam mere vujūd meñ mirī dhaḌkanoñ se juḌā rahā

vo jo rābta thā za'īf sā tire kāTne se kaTā nahīñ

kisī mehrbān ke haath ne mujhe baar baar bachā liyā

kabhī barq girne se rah ga.ī kabhī āsmān phaTā nahīñ

tirī maslahat kī muñDer par mirā ek ashk paḌā rahā

tū ne ek 'umr guzār dī mirā ek lamha kaTā nahīñ

zar-e-e'tirāf adā kiyā mire dil se bojh utar gayā

maiñ huuñ apnī zaat meñ surḳh-rū mirā koī rutba ghaTā nahīñ

mirī aañkh terī talāsh meñ tire rāste meñ paḌī rahī

kisī intishār ke daur meñ mirā dhyān tujh se haTā nahīñ

jo sar-e-nigah-e-yaqin tha wo ghubar-e-rah chhaTa nahin

wo jo sang-e-wahm tha moD par wahi raste se haTa nahin

main nikal saka nahin aaj tak tere mausamon ki girift se

jise apne aap pe zo'm tha rah-e-ibtila mein DaTa nahin

ye jo dosti ke hain silsile ye bara-e-nam hain chal rahe

mere haal par jo baras paDe kisi aankh mein wo ghaTa nahin

wo jo shakl 'am si shakl thi mujhe yaad rah gai kis tarah

mere hafize mein hai kis liye wo jo nam main ne raTa nahin

tera nam mere wujud mein meri dhaDkanon se juDa raha

wo jo rabta tha za'if sa tere kaTne se kaTa nahin

kisi mehrban ke hath ne mujhe bar bar bacha liya

kabhi barq girne se rah gai kabhi aasman phaTa nahin

teri maslahat ki munDer par mera ek ashk paDa raha

tu ne ek 'umr guzar di mera ek lamha kaTa nahin

zar-e-e'tiraf ada kiya mere dil se bojh utar gaya

main hun apni zat mein surKH-ru mera koi rutba ghaTa nahin

meri aankh teri talash mein tere raste mein paDi rahi

kisi intishaar ke daur mein mera dhyan tujh se haTa nahin