ek shabnami phuwar ne mausam badal diya

ik shabnamī phuvār ne mausam badal diyā

yaad aa ke yād-e-yār ne mausam badal diyā

sāñseñ paḌī huī thiiñ ghuTan kī girift meñ

ik mauja-e-bahār ne mausam badal diyā

zinda-dilī ne ġham ko havā meñ uḌā diyā

hañs hañs ke ġham-gusār ne mausam badal diyā

phūloñ se lad ga.iiñ mirī sochoñ kī Dāliyāñ

ḳhushbū-e-barg-o-bār ne mausam badal diyā

ik ḳhush-nazar ne ruuh meñ ThanDak utaar dī

ik chashm-e-e'tibār ne mausam badal diyā

āñkhoñ ke ḳhushk qarye bhī ābād ho gaye

ashkoñ kī ik qatār ne mausam badal diyā

qad-āvarī milī to maiñ sajde meñ gir gayā

had-darja inkisār ne mausam badal diyā

jo zehn par dabāv thā kāfūr ho gayā

ḳhush lams dast-e-yār ne mausam badal diyā

jugnū-sarisht shaḳhs ne raushan kiyā mujhe

ik barf ke sharār ne mausam badal diyā

ek shabnami phuwar ne mausam badal diya

yaad aa ke yaad-e-yar ne mausam badal diya

sansen paDi hui thin ghuTan ki girift mein

ek mauja-e-bahaar ne mausam badal diya

zinda-dili ne gham ko hawa mein uDa diya

hans hans ke gham-gusar ne mausam badal diya

phulon se lad gain meri sochon ki Daliyan

KHushbu-e-barg-o-bar ne mausam badal diya

ek KHush-nazar ne ruh mein ThanDak utar di

ek chashm-e-e'tibar ne mausam badal diya

aankhon ke KHushk qarye bhi aabaad ho gaye

ashkon ki ek qatar ne mausam badal diya

qad-awari mili to main sajde mein gir gaya

had-darja inkisar ne mausam badal diya

jo zehn par dabaw tha kafur ho gaya

KHush lams dast-e-yar ne mausam badal diya

jugnu-sarisht shaKHs ne raushan kiya mujhe

ek barf ke sharar ne mausam badal diya