hai sare ka sara jahan KHub-surat

hai saare kā saarā jahāñ ḳhūb-sūrat

suhānā hai mausam samāñ ḳhūb-sūrat

mujhe tum ne dekhā hai bāñhoñ meñ apnī

'ajab hai ye terā gumāñ ḳhūb-sūrat

shu'ā'eñ nikaltī haiñ ruḳh se tumhāre

nahīñ hai koī zau-fishāñ ḳhūb-sūrat

mohabbat kī zanjīr meñ qaid huuñ maiñ

tumhārā hai kitnā bayāñ ḳhūb-sūrat

Thikāna jo mil jaa.e dil meñ tumhāre

qasam se hai jā-e-amāñ ḳhūb-sūrat

'azīm' aap ke dil ko kitnā lubhā.e

vo 'āriz pe til kā nishāñ ḳhūb-sūrat

hai sare ka sara jahan KHub-surat

suhana hai mausam saman KHub-surat

mujhe tum ne dekha hai banhon mein apni

'ajab hai ye tera guman KHub-surat

shu'a'en nikalti hain ruKH se tumhaare

nahin hai koi zau-fishan KHub-surat

mohabbat ki zanjir mein qaid hun main

tumhaara hai kitna bayan KHub-surat

Thikana jo mil jae dil mein tumhaare

qasam se hai ja-e-aman KHub-surat

'azim' aap ke dil ko kitna lubhae

wo 'ariz pe til ka nishan KHub-surat