baadal hai ye na dhund hai mausam ka jal hai

bādal hai ye na dhund hai mausam kā jaal hai

sūraj nikal paḌe to havā kā kamāl hai

par maar kar lihāz kā panchhī bujhā na de

raushan sukūt-e-lab pe charāġh-e-savāl hai

merā lahū hai rang-e-shafaq meñ ghulā huā

merā tulū' zulmat-e-shab kā zavāl hai

gahrā sā hai chaTān ke siine meñ ik shigāf

bārīk sā ugā huā shīshe meñ baal hai

Dar kar gudāz jism ko hāthoñ se chhū ke dekh

is ḳhaufnāk saañp kī kyā narm khaal hai

kāġhaz kī kashtiyāñ tah-e-dariyā utar ga.iiñ

sailāb meñ ghirā huā shahr-e-ḳhayāl hai

aisā na ho ki dard kā laavā ubal paḌe

is āb-e-munjamid meñ balā kā ubaal hai

saaya simaT ke mere badan meñ samā gayā

us se bichhaḌ ke ab mirā ḳhud se visāl hai

'siddīq' roz-o-shab kā samāñ ek sā rahā

kitnā sapāT silsila-e-māh-o-sāl hai

baadal hai ye na dhund hai mausam ka jal hai

suraj nikal paDe to hawa ka kamal hai

par mar kar lihaz ka panchhi bujha na de

raushan sukut-e-lab pe charagh-e-sawal hai

mera lahu hai rang-e-shafaq mein ghula hua

mera tulu' zulmat-e-shab ka zawal hai

gahra sa hai chaTan ke sine mein ek shigaf

barik sa uga hua shishe mein baal hai

Dar kar gudaz jism ko hathon se chhu ke dekh

is KHaufnak sanp ki kya narm khaal hai

kaghaz ki kashtiyan tah-e-dariya utar gain

sailab mein ghira hua shahr-e-KHayal hai

aisa na ho ki dard ka lawa ubal paDe

is aab-e-munjamid mein bala ka ubaal hai

saya simaT ke mere badan mein sama gaya

us se bichhaD ke ab mera KHud se visal hai

'siddiq' roz-o-shab ka saman ek sa raha

kitna sapaT silsila-e-mah-o-sal hai