mere KHwabon mein KHayalon mein mere pas raho

mire ḳhvāboñ meñ ḳhayāloñ meñ mire paas raho

tum mire saare savāloñ meñ mire paas raho

mere qātil mire dildār masīhā mere

zaḳhm-o-marham ke havāloñ meñ mire paas raho

sham-e-ruḳhsār liye gesū-e-ḳhamdār liye

sab añdheroñ meñ ujāloñ meñ mire paas raho

kabhī ḳhushbū kabhī saaya kabhī paikar ban kar

sabhī hijroñ meñ visāloñ meñ mire paas raho

ho tumhīñ juuhī tumhīñ rolī tumheñ pārvatī

husn-e-ḳhūbāñ kī misāloñ meñ mire paas raho

apnī palkoñ pe sajā.e hue namnāk charāġh

dam-e-āḳhir ke sambhāloñ meñ mire paas raho

mere KHwabon mein KHayalon mein mere pas raho

tum mere sare sawalon mein mere pas raho

mere qatil mere dildar masiha mere

zaKHm-o-marham ke hawalon mein mere pas raho

sham-e-ruKHsar liye gesu-e-KHamdar liye

sab andheron mein ujalon mein mere pas raho

kabhi KHushbu kabhi saya kabhi paikar ban kar

sabhi hijron mein visalon mein mere pas raho

ho tumhin juhi tumhin roli tumhein parwati

husn-e-KHuban ki misalon mein mere pas raho

apni palkon pe sajae hue namnak charagh

dam-e-aKHir ke sambhaalon mein mere pas raho