manzur thi ye shakl tajalli ko nur ki

manzūr thī ye shakl tajallī ko nuur kī

qismat khulī tire qad-o-ruḳh se zuhūr kī

ik ḳhūñ-chakāñ kafan meñ karoḌoñ banāo haiñ

paḌtī hai aañkh tere shahīdoñ pe huur kī

vaa.iz na tum piyo na kisī ko pilā sako

kyā baat hai tumhārī sharāb-e-tahūr kī

laḌtā hai mujh se hashr meñ qātil ki kyuuñ uThā

goyā abhī sunī nahīñ āvāz suur kī

aamad bahār kī hai jo bulbul hai naġhma-sañj

uḌtī sī ik ḳhabar hai zabānī tuyūr kī

go vaañ nahīñ pa vaañ ke nikāle hue to haiñ

ka.abe se in butoñ ko bhī nisbat hai duur kī

kyā farz hai ki sab ko mile ek sā javāb

aao na ham bhī sair kareñ koh-e-tūr kī

garmī sahī kalām meñ lekin na is qadar

kī jis se baat us ne shikāyat zarūr kī

'ġhālib' gar is safar meñ mujhe saath le chaleñ

haj kā savāb nazr karūñgā huzūr kī

manzur thi ye shakl tajalli ko nur ki

qismat khuli tere qad-o-ruKH se zuhur ki

ek KHun-chakan kafan mein karoDon banao hain

paDti hai aankh tere shahidon pe hur ki

waiz na tum piyo na kisi ko pila sako

kya baat hai tumhaari sharab-e-tahur ki

laDta hai mujh se hashr mein qatil ki kyun uTha

goya abhi suni nahin aawaz sur ki

aamad bahaar ki hai jo bulbul hai naghma-sanj

uDti si ek KHabar hai zabani tuyur ki

go wan nahin pa wan ke nikale hue to hain

kabe se in buton ko bhi nisbat hai dur ki

kya farz hai ki sab ko mile ek sa jawab

aao na hum bhi sair karen koh-e-tur ki

garmi sahi kalam mein lekin na is qadar

ki jis se baat us ne shikayat zarur ki

'ghaalib' gar is safar mein mujhe sath le chalen

haj ka sawab nazr karunga huzur ki