main to hua hun gardish-e-sham-o-sahar mein gum

maiñ to huā huuñ gardish-e-shām-o-sahar meñ gum

manzil ko kyā huā vo huī kis safar meñ gum

kyuuñ gum huī nigāh tirī kā.ināt meñ

jab se mirī nazar huī terī nazar meñ gum

sāhil pe aa lagā hai mire nā-ḳhudā kī ḳhair

apnī balā se kashtī huī kis bhañvar meñ gum

anjām-e-ārzū hai faqat marg-e-ārzū

dil se nikal ke baat huī ḳhud asar meñ gum

mahshar se kam nahīñ hai ye hangām-e-zindagī

phirte haiñ lākhoñ aadmī tanhā nagar meñ gum

ye aur baat tujh ko hamārī ḳhabar na ho

ham ho chuke haiñ kab se tirī rah-guzar meñ gum

ab sub.h-e-nau se ḳhaak tavaqqo' kare koī

jab āftāb ho gayā gard-e-safar meñ gum

uḌne ke baa'd aap ḳhalāoñ meñ kho ga.e

achchhe rahe hamīñ ki rahe bāl-o-par meñ gum

'vāsif' vo ek baat jo lab tak na aa sakī

vo baat ho ga.ī hai mirī chashm-e-tar meñ gum

main to hua hun gardish-e-sham-o-sahar mein gum

manzil ko kya hua wo hui kis safar mein gum

kyun gum hui nigah teri kainat mein

jab se meri nazar hui teri nazar mein gum

sahil pe aa laga hai mere na-KHuda ki KHair

apni bala se kashti hui kis bhanwar mein gum

anjam-e-arzu hai faqat marg-e-arzu

dil se nikal ke baat hui KHud asar mein gum

mahshar se kam nahin hai ye hangam-e-zindagi

phirte hain lakhon aadmi tanha nagar mein gum

ye aur baat tujh ko hamari KHabar na ho

hum ho chuke hain kab se teri rah-guzar mein gum

ab subh-e-nau se KHak tawaqqo' kare koi

jab aaftab ho gaya gard-e-safar mein gum

uDne ke ba'd aap KHalaon mein kho gae

achchhe rahe hamin ki rahe baal-o-par mein gum

'wasif' wo ek baat jo lab tak na aa saki

wo baat ho gai hai meri chashm-e-tar mein gum