taron se mera jam bharo main nashe mein hun

tāroñ se merā jaam bharo maiñ nashe meñ huuñ

ai sākinān-e-ḳhuld suno maiñ nashe meñ huuñ

kuchh phuul khil rahe haiñ sar-e-shāḳh-e-mai-kada

tum hī zarā ye phuul chuno maiñ nashe meñ huuñ

Thahro abhī to sub.h kā maarā hai zau-fishāñ

dekho mujhe fareb na do maiñ nashe meñ huuñ

nashsha to maut hai ġham-e-hastī kī dhuup meñ

bikhrā ke zulf saath chalo maiñ nashe meñ huuñ

mela yuuñ hī rahe ye sar-e-rahguzār-e-zīst

ab jaam sāmne hī rakho maiñ nashe meñ huuñ

paa.el chhanak rahī hai nigār-e-ḳhayāl kī

kuchh ehtimām-e-raqs karo maiñ nashe meñ huuñ

maiñ Dagmagā rahā huuñ bayābān-e-hosh meñ

mere abhī qarīb raho maiñ nashe meñ huuñ

hai sirf ik tabassum-e-rañgīñ bahut mujhe

'sāġhar' ba-dosh lāla-ruḳho maiñ nashe meñ huuñ

taron se mera jam bharo main nashe mein hun

ai sakinan-e-KHuld suno main nashe mein hun

kuchh phul khil rahe hain sar-e-shaKH-e-mai-kada

tum hi zara ye phul chuno main nashe mein hun

Thahro abhi to subh ka mara hai zau-fishan

dekho mujhe fareb na do main nashe mein hun

nashsha to maut hai gham-e-hasti ki dhup mein

bikhra ke zulf sath chalo main nashe mein hun

mela yun hi rahe ye sar-e-rahguzar-e-zist

ab jam samne hi rakho main nashe mein hun

pael chhanak rahi hai nigar-e-KHayal ki

kuchh ehtimam-e-raqs karo main nashe mein hun

main Dagmaga raha hun bayaban-e-hosh mein

mere abhi qarib raho main nashe mein hun

hai sirf ek tabassum-e-rangin bahut mujhe

'saghar' ba-dosh lala-ruKHo main nashe mein hun