sawal-e-jam bhala bar bar kya karte

savāl-e-jām bhalā baar baar kyā karte

na chhīnte jo subū bāda-ḳhvār kyā karte

hazār baar jinheñ aazmā ke dekh liyā

ham un kī baat kā phir e'tibār kyā karte

tamām raat jo ginte rahe sitāroñ ko

vo mere dāġh-e-jigar kā shumār kyā karte

jinheñ pasand haiñ hirs-o-havas ke afsāne

ham un se zikr-e-ġham-e-rozgār kyā karte

junūñ kī raushnī kartī ho jin kī rāhbarī

numūd-e-sub.h kā vo intizār kyā karte

'abas haiñ ahl-e-ḳhirad se shikāyateñ 'muztar'

jo mahv-e-ḳhvāb haiñ ḳhud hoshyār kyā karte

sawal-e-jam bhala bar bar kya karte

na chhinte jo subu baada-KHwar kya karte

hazar bar jinhen aazma ke dekh liya

hum un ki baat ka phir e'tibar kya karte

tamam raat jo ginte rahe sitaron ko

wo mere dagh-e-jigar ka shumar kya karte

jinhen pasand hain hirs-o-hawas ke afsane

hum un se zikr-e-gham-e-rozgar kya karte

junun ki raushni karti ho jin ki rahbari

numud-e-subh ka wo intizar kya karte

'abas hain ahl-e-KHirad se shikayaten 'muztar'

jo mahw-e-KHwab hain KHud hoshyar kya karte