raston se kya gila hai jo manzil yahan nahin

rastoñ se kyā gila hai jo manzil yahāñ nahīñ

jis paar thā utarnā vo sāhil yahāñ nahīñ

maanā vahī hai shahr vahī bhīḌ-bhāḌ hai

jis ko mirī talāsh vo mahfil yahāñ nahīñ

lāzim hai kyuuñ hamī pe har ik ḳhvāb dekhnā

kyuuñ ham kisī ke ḳhvāb kā hāsil yahāñ nahīñ

mumkin kahāñ hai aur kī ab justujū ai dil

jab ik nazar ke bhī koī qābil yahāñ nahīñ

tum aur tumhāre baa'd ye āsāniyāñ huiiñ

ab aur koī bhī hameñ mushkil yahāñ nahīñ

nīñdoñ ko ham se bichhḌe zamāne guzar ga.e

yādoñ se aaj kahnā vo ġhāfil yahāñ nahīñ

jo bhī yahāñ pe niklā mohabbat hai bāñTne

dariyā meñ pheñk aayā ki saa.il yahāñ nahīñ

'abrak' uTho chalo kahīñ dete haiñ aur jaañ

tū jis ko DhūñDtā hai vo qātil yahāñ nahīñ

raston se kya gila hai jo manzil yahan nahin

jis par tha utarna wo sahil yahan nahin

mana wahi hai shahr wahi bhiD-bhaD hai

jis ko meri talash wo mahfil yahan nahin

lazim hai kyun hami pe har ek KHwab dekhna

kyun hum kisi ke KHwab ka hasil yahan nahin

mumkin kahan hai aur ki ab justuju ai dil

jab ek nazar ke bhi koi qabil yahan nahin

tum aur tumhaare ba'd ye aasaniyan huin

ab aur koi bhi hamein mushkil yahan nahin

nindon ko hum se bichhDe zamane guzar gae

yaadon se aaj kahna wo ghafil yahan nahin

jo bhi yahan pe nikla mohabbat hai banTne

dariya mein phenk aaya ki sail yahan nahin

'abrak' uTho chalo kahin dete hain aur jaan

tu jis ko DhunDta hai wo qatil yahan nahin