hum to ek wahm ki KHush-chehra bala se nikle

ham to ik vahm kī ḳhush-chehra balā se nikle

kyā huā dost agar ḳhuun ke pyāse nikle

dil meñ aayā thā ki marham hī kisī se māñgeñ

sansanāte hue kuchh tiir fazā se nikle

ḳham-ba-ḳham zulf ruḳh-e-sub.h pe chhā.ī hī rahī

zulf-e-tīra ke na ḳham dast-e-sabā se nikle

khol paa.e the ba-mushkil vo bañdhī muTThī magar

TukḌe ḳhvāboñ hī ke kuchh musht-e-havā se nikle

ajnabiyyat ki mohabbat ki ḳhayāl-e-vā'da

kitne hī pahlū tirī ek hayā se nikle

rang-o-rā'nā.ī bahāroñ meñ kahāñ thī pahle

saikḌoñ rang tire rang-e-qabā se nikle

qasr-e-tanhā.ī to TuuTe koī aahaT to ho

ik janāza hī kisī dasht-e-vafā se nikle

ham vo pyāse the 'na.īmī' ki hamārī ḳhātir

ḳhuun ke dariyā sarāboñ kī jaTā se nikle

hum to ek wahm ki KHush-chehra bala se nikle

kya hua dost agar KHun ke pyase nikle

dil mein aaya tha ki marham hi kisi se mangen

sansanate hue kuchh tir faza se nikle

KHam-ba-KHam zulf ruKH-e-subh pe chhai hi rahi

zulf-e-tira ke na KHam dast-e-saba se nikle

khol pae the ba-mushkil wo bandhi muTThi magar

TukDe KHwabon hi ke kuchh musht-e-hawa se nikle

ajnabiyyat ki mohabbat ki KHayal-e-wa'da

kitne hi pahlu teri ek haya se nikle

rang-o-ra'nai bahaaron mein kahan thi pahle

saikDon rang tere rang-e-qaba se nikle

qasr-e-tanhai to TuTe koi aahaT to ho

ek janaza hi kisi dasht-e-wafa se nikle

hum wo pyase the 'naimi' ki hamari KHatir

KHun ke dariya sarabon ki jaTa se nikle