baiThe hue ek ek ka munh dekh rahe hain

baiThe hue ek ek kā muñh dekh rahe haiñ

kahte phireñ kis kis se jo dukh ham ne sahe haiñ

jī ko to vo achchhe lage par un kī 'ināyat

dukh un se bhale haiñ ki mire saath rahe haiñ

kab tum se gila ham ne kiyā kam-nigahī kā

haañ dekhne vāloñ ne kuchh afsāne kahe haiñ

samjhānā to ham ne bhī bahut chāhā thā dil ko

dil jaise divāne kabhī qaabū meñ rahe haiñ

hañsne se bhī sunte haiñ ki bhar aatī haiñ āñkheñ

ashkoñ pe na jaao ki bahar-hāl bahe haiñ

phūloñ ke kaToroñ se jahāñ chhalkī hai shabnam

kāñToñ ke bhī aañsū isī miTTī pe bahe haiñ

sochoñ ke ḳhazānoñ pe bhī nāgoñ kā hai pahrā

dil chiiz hī kyā hai yahāñ kā'be bhī Dhahe haiñ

puujo ki taġhāful karo duniyā hai ye logo

chaḌhte hue sūraj yahāñ pal bhar meñ gahe haiñ

baiThe hue ek ek ka munh dekh rahe hain

kahte phiren kis kis se jo dukh hum ne sahe hain

ji ko to wo achchhe lage par un ki 'inayat

dukh un se bhale hain ki mere sath rahe hain

kab tum se gila hum ne kiya kam-nigahi ka

han dekhne walon ne kuchh afsane kahe hain

samjhana to hum ne bhi bahut chaha tha dil ko

dil jaise diwane kabhi qabu mein rahe hain

hansne se bhi sunte hain ki bhar aati hain aankhen

ashkon pe na jao ki bahar-haal bahe hain

phulon ke kaToron se jahan chhalki hai shabnam

kanTon ke bhi aansu isi miTTi pe bahe hain

sochon ke KHazanon pe bhi nagon ka hai pahra

dil chiz hi kya hai yahan ka'be bhi Dhahe hain

pujo ki taghaful karo duniya hai ye logo

chaDhte hue suraj yahan pal bhar mein gahe hain