milenge har taraf KHushbu ko KHushbu bolne wale

mileñge har taraf ḳhushbū ko ḳhushbū bolne vaale

kahāñ jaa.eñ kidhar jaa.eñ ab urdu bolne vaale

tumhārī shaan meñ shikve kī gustāḳhī na kar baiTheñ

mirī palkoñ pe aa jaate haiñ aañsū bolne vaale

shab-e-tanhā.ī meñ ham lab na sī lete to kyā karte

sitāre sunñe vaale the na jugnū bolne vaale

tumhāre pyaar ne sab ko muḳhālif kar diyā merā

ka.ī ahbāb the pahlū-ba-pahlū bolne vaale

qazā alfāz kī sho'la-bayānī chhīn letī hai

hue ḳhāmosh changez-o-halākū bolne vaale

tijārat kā bharosa kho diyā dukkān-dāroñ ne

banā.e jaa.eñ ab 'sāhil' tarāzū bolne vaale

milenge har taraf KHushbu ko KHushbu bolne wale

kahan jaen kidhar jaen ab urdu bolne wale

tumhaari shan mein shikwe ki gustaKHi na kar baiThen

meri palkon pe aa jate hain aansu bolne wale

shab-e-tanhai mein hum lab na si lete to kya karte

sitare sunne wale the na jugnu bolne wale

tumhaare pyar ne sab ko muKHalif kar diya mera

kai ahbab the pahlu-ba-pahlu bolne wale

qaza alfaz ki sho'la-bayani chhin leti hai

hue KHamosh changez-o-halaku bolne wale

tijarat ka bharosa kho diya dukkan-daron ne

banae jaen ab 'sahil' taraazu bolne wale