mahfil saji thi raat ghazal ki nigah se

mahfil sajī thī raat ġhazal kī nigāh se

ḳhush thī mirī hayāt ġhazal kī nigāh se

vāqif to pahle ho leñ mizāj-e-ġhazal se aap

varna na hogī baat ġhazal kī nigāh se

furqat alam ke phuul nazar ā.eñge tumheñ

dekhoge tum jo raat ġhazal kī nigāh se

tanhā.iyoñ meñ bārhā pūchhā hayāt ne

pāoge kab najāt ġhazal kī nigāh se

rishta hai is kā sab se ye sab kī 'azīz hai

pūchheñ na zāt-pāt ġhazal kī nigāh se

afkār ke gulāb se ḳhush-rang ho ga.e

sajte haiñ kāġhzāt ġhazal kī nigāh se

vo surḳh-rū huā hai har ik sinf meñ 'zafar'

khaa.ī na jis ne maat ġhazal kī nigāh se

mahfil saji thi raat ghazal ki nigah se

KHush thi meri hayat ghazal ki nigah se

waqif to pahle ho len mizaj-e-ghazal se aap

warna na hogi baat ghazal ki nigah se

furqat alam ke phul nazar aaenge tumhein

dekhoge tum jo raat ghazal ki nigah se

tanhaiyon mein barha puchha hayat ne

paoge kab najat ghazal ki nigah se

rishta hai is ka sab se ye sab ki 'aziz hai

puchhen na zat-pat ghazal ki nigah se

afkar ke gulab se KHush-rang ho gae

sajte hain kaghzat ghazal ki nigah se

wo surKH-ru hua hai har ek sinf mein 'zafar'

khai na jis ne mat ghazal ki nigah se