main kaise yaqin kar lun tu sach bol raha hai

maiñ kaise yaqīñ kar luuñ tū sach bol rahā hai

aksar tirī bātoñ meñ baḌā jhol rahā hai

ab ḳhuun ke rishte ko maiñ āzād karūñgā

uḌne ko zamāne meñ vo par khol rahā hai

mahbūb ke dīdār kī ḳhvāhish liye dil meñ

dīvāna sar-e-rāh-guzar Dol rahā hai

maġhrūr hai mazrūb hai yā phir koī kāhil

dāñtoñ se jo insān girah khol rahā hai

shāyad use ehsān kī qīmat nahīñ mā'lūm

kam-zarf tarāzū meñ vafā tol rahā hai

maiñ ne kabhī matlab se nahīñ rakkhā ta'alluq

iḳhlās se mamlū mirā kashkol rahā hai

har lafz se hotī rahī tā'mīr adab kī

shā'ir to har ik daur meñ anmol rahā hai

girvīda 'azīm' is liye duniyā huī terī

vallāh ġhazal meñ tirā fan bol rahā hai

main kaise yaqin kar lun tu sach bol raha hai

aksar teri baaton mein baDa jhol raha hai

ab KHun ke rishte ko main aazad karunga

uDne ko zamane mein wo par khol raha hai

mahbub ke didar ki KHwahish liye dil mein

diwana sar-e-rah-guzar Dol raha hai

maghrur hai mazrub hai ya phir koi kahil

danton se jo insan girah khol raha hai

shayad use ehsan ki qimat nahin ma'lum

kam-zarf taraazu mein wafa tol raha hai

main ne kabhi matlab se nahin rakkha ta'alluq

iKHlas se mamlu mera kashkol raha hai

har lafz se hoti rahi ta'mir adab ki

sha'ir to har ek daur mein anmol raha hai

girwida 'azim' is liye duniya hui teri

wallah ghazal mein tera fan bol raha hai