kuchh to taskin-e-iztirab mile

kuchh to taskīn-e-iztirāb mile

vo nahīñ milte to sharāb mile

maiñ samandar meñ bhī rahā pyāsā

aab meñ bhī mujhe sarāb mile

muñh lagī chhūTtī nahīñ vā'iz

ab jo milnā hai so 'azāb mile

chuum luuñ maiñ varaq varaq us kā

tere chehre se jo kitāb mile

zindagī zindagī sī lagtī hai

aap jab se hameñ janāb mile

kaun tā'bīr kī kare chintā

phir se koī hasīn ḳhvāb mile

din 'ibādat meñ ho guzar yārab

vaqt-e-maġhrib magar sharāb mile

yā-ḳhudā dil mile shajar jaisā

ġham jo mujh ko haiñ be-hisāb mile

khul ke ronā bhī kab nasīb huā

phir na ye hastī-e-habāb mile

dil ke nikle ġharīb sab ke sab

ham ko jo sāhab-e-nisāb mile

kuchh to pahle hī dar-ba-dar thā 'sadā'

dost bhī ḳhānumāñ-ḳharāb mile

kuchh to taskin-e-iztirab mile

wo nahin milte to sharab mile

main samandar mein bhi raha pyasa

aab mein bhi mujhe sarab mile

munh lagi chhuTti nahin wa'iz

ab jo milna hai so 'azab mile

chum lun main waraq waraq us ka

tere chehre se jo kitab mile

zindagi zindagi si lagti hai

aap jab se hamein janab mile

kaun ta'bir ki kare chinta

phir se koi hasin KHwab mile

din 'ibaadat mein ho guzar yarab

waqt-e-maghrib magar sharab mile

ya-KHuda dil mile shajar jaisa

gham jo mujh ko hain be-hisab mile

khul ke rona bhi kab nasib hua

phir na ye hasti-e-habab mile

dil ke nikle gharib sab ke sab

hum ko jo sahab-e-nisab mile

kuchh to pahle hi dar-ba-dar tha 'sada'

dost bhi KHanuman-KHarab mile