koi naghma banun chandni ne kaha chandni ke liye ek taza ghazal

koī naġhma banūñ chāñdnī ne kahā chāñdnī ke liye ek taaza ġhazal

koī taaza ġhazal phir kisī ne kahā phir kisī ke liye ek taaza ġhazal

zaḳhm-e-furqat ko palkoñ se siite hue saañs lene kī aadat meñ jiite hue

ab bhī zinda ho tum zindagī ne kahā zindagī ke liye ek taaza ġhazal

us kī ḳhvāhish pe tum ko bharosā bhī hai us ke hone na hone kā jhagḌā bhī hai

lutf aayā tumheñ gumrahī ne kahā gumrahī ke liye ek taaza ġhazal

aisī duniyā meñ kab tak guzārā kareñ tum hī kah do ki kaise gavārā kareñ

raat mujh se mirī bebasī ne kahā bebasī ke liye ek taaza ġhazal

manzaroñ se bahalnā zarūrī nahīñ ghar se bāhar nikalnā zarūrī nahīñ

dil ko raushan karo raushnī ne kahā raushnī ke liye ek taaza ġhazal

maiñ ibādat bhī huuñ maiñ mohabbat bhī huuñ zindagī kī numū kī alāmat bhī huuñ

merī palkoñ pe Thahrī namī ne kahā is namī ke liye ek taaza ġhazal

ārzūoñ kī maalā pirone se haiñ ye zamīñ āsmāñ mere hone se haiñ

mujh pe bhī kuchh kaho aadmī ne kahā aadmī ke liye ek taaza ġhazal

apnī tanhā.ī meñ raat maiñ thā magan ek aahaT huī dhyān meñ daf.atan

mujh se bāteñ karo ḳhāmushī ne kahā ḳhāmushī ke liye ek taaza ġhazal

jab rifāqat kā sāmāñ baham kar liyā maiñ ne āḳhir use ham-qadam kar liyā

ab mire dukh saho ham-rahī ne kahā ham-rahī ke liye ek taaza ġhazal

koi naghma banun chandni ne kaha chandni ke liye ek taza ghazal

koi taza ghazal phir kisi ne kaha phir kisi ke liye ek taza ghazal

zaKHm-e-furqat ko palkon se site hue sans lene ki aadat mein jite hue

ab bhi zinda ho tum zindagi ne kaha zindagi ke liye ek taza ghazal

us ki KHwahish pe tum ko bharosa bhi hai us ke hone na hone ka jhagDa bhi hai

lutf aaya tumhein gumrahi ne kaha gumrahi ke liye ek taza ghazal

aisi duniya mein kab tak guzara karen tum hi kah do ki kaise gawara karen

raat mujh se meri bebasi ne kaha bebasi ke liye ek taza ghazal

manzaron se bahalna zaruri nahin ghar se bahar nikalna zaruri nahin

dil ko raushan karo raushni ne kaha raushni ke liye ek taza ghazal

main ibaadat bhi hun main mohabbat bhi hun zindagi ki numu ki alamat bhi hun

meri palkon pe Thahri nami ne kaha is nami ke liye ek taza ghazal

aarzuon ki mala pirone se hain ye zamin aasman mere hone se hain

mujh pe bhi kuchh kaho aadmi ne kaha aadmi ke liye ek taza ghazal

apni tanhai mein raat main tha magan ek aahaT hui dhyan mein dafatan

mujh se baaten karo KHamushi ne kaha KHamushi ke liye ek taza ghazal

jab rifaqat ka saman baham kar liya main ne aaKHir use ham-qadam kar liya

ab mere dukh saho ham-rahi ne kaha ham-rahi ke liye ek taza ghazal