hisab-e-jism ki izzat dar-o-diwar se hai

hisāb-e-jism kī 'izzat dar-o-dīvār se hai

diloñ par hukmrānī to faqat kirdār se hai

guloñ kī nāzukī do chaar din tak saath degī

hamesha saath dene kī talab bas ḳhaar se hai

faqīrī kā shahanshāhī se koī mel kyā hai

du'āoñ se yahāñ raġhbat vahāñ talvār se hai

tumhāre jaisā banñe kā nahīñ hai shauq mujh ko

mirī pahchān mere jubba-o-dastār se hai

ham āsā.ish meñ āḳhir bhuul jaa.eñ kyuuñ bure din

hamārī jiit kā rishta hamārī haar se hai

hamārī soch ko de de kahīñ Thahrāv yā-rab

hamārā sāmnā pastī se hai raftār se hai

hameñ gosha-nashīnī meñ bhī mil jaatī hai shohrat

hamārā silsila 'āzar' hirā ke ġhaar se hai

hisab-e-jism ki 'izzat dar-o-diwar se hai

dilon par hukmrani to faqat kirdar se hai

gulon ki nazuki do chaar din tak sath degi

hamesha sath dene ki talab bas KHar se hai

faqiri ka shahanshahi se koi mel kya hai

du'aon se yahan raghbat wahan talwar se hai

tumhaare jaisa banne ka nahin hai shauq mujh ko

meri pahchan mere jubba-o-dastar se hai

hum aasaish mein aaKHir bhul jaen kyun bure din

hamari jit ka rishta hamari haar se hai

hamari soch ko de de kahin Thahraw ya-rab

hamara samna pasti se hai raftar se hai

hamein gosha-nashini mein bhi mil jati hai shohrat

hamara silsila 'azar' hira ke ghaar se hai