KHwab mein ek makan dekha tha

ḳhvāb meñ ek makāñ dekhā thā

phir na khiḌkī thī na darvāza thā

suune raste pe sar-e-shām koī

ghar kī yādoñ meñ ghirā baiThā thā

log kahte haiñ ki mujh sā thā koī

vo jo bachchoñ kī tarah royā thā

raat thī aur koī saath na thā

chāñd bhī duur khaḌā hañstā thā

ek melā sā lagā thā dil meñ

maiñ akelā hī phirā kartā thā

aisā hañgāma na thā jangal meñ

shahr meñ aa.e to Dar lagtā thā

ġham ke dariyā meñ tirī yādoñ kā

ik jazīra sā ubhar aayā thā

kaun aayā thā makāñ meñ 'alvī'

kis ne darvāza abhī kholā thā

KHwab mein ek makan dekha tha

phir na khiDki thi na darwaza tha

sune raste pe sar-e-sham koi

ghar ki yaadon mein ghira baiTha tha

log kahte hain ki mujh sa tha koi

wo jo bachchon ki tarah roya tha

raat thi aur koi sath na tha

chand bhi dur khaDa hansta tha

ek mela sa laga tha dil mein

main akela hi phira karta tha

aisa hangama na tha jangal mein

shahr mein aae to Dar lagta tha

gham ke dariya mein teri yaadon ka

ek jazira sa ubhar aaya tha

kaun aaya tha makan mein 'alwi'

kis ne darwaza abhi khola tha