qaid-e-zaman se aage qaid-e-makan se aage

qaid-e-zamāñ se aage qaid-e-makāñ se aage

parvāz kar rahā huuñ maiñ āsmāñ se aage

ai barq merī fitrat me'mār-e-āshiyāñ hai

haiñ saiñkaḌoñ nasheman is āshiyāñ se aage

vā'iz kī tang-nazrī vā'iz hī ko mubārak

merā maqām dil hai bāġh-e-jināñ se aage

ai shaiḳh tere sajde mahdūd haiñ vahīñ tak

maiñ sar jhukā rahā huuñ jis āstāñ se aage

ik jāvedāñ tarannum ik jāvedāñ tabassum

mere liye haiñ muztar is gulsitāñ se aage

'azm-o-'amal hamāre ai dil haiñ gar salāmat

'ālam nayā banegā donoñ jahāñ se aage

ghabrā ke buz-dilī se tang aa ke bebasī se

'hindī' gayā hai shāyad hindostāñ se aage

qaid-e-zaman se aage qaid-e-makan se aage

parwaz kar raha hun main aasman se aage

ai barq meri fitrat me'mar-e-ashiyan hai

hain sainkaDon nasheman is aashiyan se aage

wa'iz ki tang-nazri wa'iz hi ko mubarak

mera maqam dil hai bagh-e-jinan se aage

ai shaiKH tere sajde mahdud hain wahin tak

main sar jhuka raha hun jis aastan se aage

ek jawedan tarannum ek jawedan tabassum

mere liye hain muztar is gulsitan se aage

'azm-o-'amal hamare ai dil hain gar salamat

'alam naya banega donon jahan se aage

ghabra ke buz-dili se tang aa ke bebasi se

'hindi' gaya hai shayad hindostan se aage