mujhi se shahr mein kyun ijtinab hai bhai

mujhī se shahr meñ kyuuñ ijtināb hai bhaa.ī

mire bhī haath meñ taaza gulāb hai bhaa.ī

ye TimTimātā huā ik charāġh hai lekin

yahī hamāre liye āftāb hai bhaa.ī

na.e makāñ meñ na.e dostoñ se miltā huuñ

purāne ghar meñ purānī kitāb hai bhaa.ī

yahāñ bhī phuul ke paudoñ meñ phuul khilte haiñ

hamāre shahr kī miTTī ḳharāb hai bhaa.ī

tire savāl pe jo lā-javāb rahtā hai

usī ke paas mukammal javāb hai bhaa.ī

tumhārī tarh mujhe bhī talāsh hai apnī

mirā ḳhudī se purānā hisāb hai bhaa.ī

jo ashk bah na sake maiñ taḌap ke mar jā.ūñ

mujhe rulāo ki kār-e-savāb hai bhaa.ī

sazā ke taur pe āñkhoñ ko noch lo lekin

zarā sañbhal ke mohabbat kā ḳhvāb hai bhaa.ī

mahak rahī hai abhī tak tirī ġhazal 'sāgar'

mushā'era to baḌā kām-yāb hai bhaa.ī

mujhi se shahr mein kyun ijtinab hai bhai

mere bhi hath mein taza gulab hai bhai

ye TimTimata hua ek charagh hai lekin

yahi hamare liye aaftab hai bhai

nae makan mein nae doston se milta hun

purane ghar mein purani kitab hai bhai

yahan bhi phul ke paudon mein phul khilte hain

hamare shahr ki miTTi KHarab hai bhai

tere sawal pe jo la-jawab rahta hai

usi ke pas mukammal jawab hai bhai

tumhaari tarh mujhe bhi talash hai apni

mera KHudi se purana hisab hai bhai

jo ashk bah na sake main taDap ke mar jaun

mujhe rulao ki kar-e-sawab hai bhai

saza ke taur pe aankhon ko noch lo lekin

zara sanbhal ke mohabbat ka KHwab hai bhai

mahak rahi hai abhi tak teri ghazal 'sagar'

musha'era to baDa kaam-yab hai bhai