mujhe laga ki ye nazil koi azab hua

mujhe lagā ki ye nāzil koī 'azāb huā

tirī vafāoñ kā jab band mujh pe baab huā

vo dil-fareb kahāñ kho gayā ki ab mujh par

visāl-rut kā har imkāñ ḳhayāl-o-ḳhvāb huā

usī kā bhaao hamesha girā sar-e-bāzār

jo dūsroñ ko ba-āsānī dastyāb huā

kareñ haiñ ābrū-poshī zarā se chithḌe se

kahāñ pe qarz liyā thā kahāñ hisāb huā

tirā hī 'aks mirī zaat meñ numāyāñ hai

tirī 'atā se maiñ zarre se āftāb huā

dayār-e-she'r kā ik sālik-e-suḳhan huuñ maiñ

ki mere dar pe jo aayā vo faiz-yāb huā

mujhe laga ki ye nazil koi 'azab hua

teri wafaon ka jab band mujh pe bab hua

wo dil-fareb kahan kho gaya ki ab mujh par

visal-rut ka har imkan KHayal-o-KHwab hua

usi ka bhao hamesha gira sar-e-bazar

jo dusron ko ba-asani dastyab hua

karen hain aabru-poshi zara se chithDe se

kahan pe qarz liya tha kahan hisab hua

tera hi 'aks meri zat mein numayan hai

teri 'ata se main zarre se aaftab hua

dayar-e-she'r ka ek salik-e-suKHan hun main

ki mere dar pe jo aaya wo faiz-yab hua