main ye nahin kahta ki bayaban mein khila hun

maiñ ye nahīñ kahtā ki bayābāñ meñ khilā huuñ

ḳhushbū meñ magar dūsre phūloñ se judā huuñ

sun lo to utar jā.ūñgā dil meñ bahar-andāz

naġhma huuñ chaTakte hue ġhunchoñ kī sadā huuñ

zehnoñ meñ jagātā huuñ na.ī sub.h kā ehsās

maiñ fikr ke chaḌhte hue sūraj kī ziyā huuñ

phailūñ to maiñ sarmā kī sajal dhuup kī ḳhushbū

barsūñ to mahakte hue sāvan kī ghaTā huuñ

maqtal se chaman tak hai mirī zaat kā partav

juuñ ḳhūn-e-shahīdāñ tire hāthoñ kī hinā huuñ

ik dard jagā detā huuñ soī huī shab meñ

maiñ 'arsh se ik TūTte taare kī bukā huuñ

auroñ ke kisī phuul kī ḳhushbū nahīñ mujh meñ

jo kuchh bhī huuñ bas apne hī gulshan kī havā huuñ

tūfān huuñ sāhil huuñ maiñ ilhām huuñ ib.hām

shā'ir huuñ mufakkir huuñ payambar huuñ ḳhudā huuñ

tum chal ke miTā Daalo mire paaoñ kā har naqsh

maiñ ret ke sahrā meñ agar samt-numā huuñ

oḌhā hai kisī vaqt meñ shaitāñ kā labāda

vo vaqt bhī aayā hai ki jibrīl banā huuñ

naġhme bhī likhe raat ko pahre bhī diye haiñ

us jang meñ maiñ bhī to barābar se laḌā huuñ

haañ yuuñ bhī huā hai ki kabhī tujh ko manā kar

maiñ tere tajāhul ke 'evaz ruuTh gayā huuñ

haañ yuuñ bhī huā hai ki kabhī zaḳhm khurach kar

maiñ apne hī ashkoñ pe ka.ī baar hañsā huuñ

haañ yuuñ bhī huā hai ki tujhe dhyān meñ lā kar

maiñ fart-e-parastish meñ tujhe bhuul gayā huuñ

haañ yuuñ bhī huā hai ki tire sāmne aa kar

qāsir huuñ samajhne se ki maiñ kaun huuñ kyā huuñ

kyuuñ chāñd ke mandir meñ zamīñ chhoḌ ke jā.ūñ

beTā huuñ maiñ jis maañ kā use puuj rahā huuñ

hai 'ijz kī sūrat na takabbur kī zarūrat

achchhā huuñ hazāroñ se hazāroñ se burā huuñ

ho aur to siine meñ chhurā ghoñp ke mar jaa.e

jis karb se maiñ aaj lahū thuuk rahā huuñ

aur ek ġham-e-zāt ke hote hue 'zulfī'

mumkin nahīñ mujh se ki kisī aur ko chāhūñ

main ye nahin kahta ki bayaban mein khila hun

KHushbu mein magar dusre phulon se juda hun

sun lo to utar jaunga dil mein bahar-andaz

naghma hun chaTakte hue ghunchon ki sada hun

zehnon mein jagata hun nai subh ka ehsas

main fikr ke chaDhte hue suraj ki ziya hun

phailun to main sarma ki sajal dhup ki KHushbu

barsun to mahakte hue sawan ki ghaTa hun

maqtal se chaman tak hai meri zat ka partaw

jun KHun-e-shahidan tere hathon ki hina hun

ek dard jaga deta hun soi hui shab mein

main 'arsh se ek TuTte tare ki buka hun

auron ke kisi phul ki KHushbu nahin mujh mein

jo kuchh bhi hun bas apne hi gulshan ki hawa hun

tufan hun sahil hun main ilham hun ibham

sha'ir hun mufakkir hun payambar hun KHuda hun

tum chal ke miTa Dalo mere paon ka har naqsh

main ret ke sahra mein agar samt-numa hun

oDha hai kisi waqt mein shaitan ka labaada

wo waqt bhi aaya hai ki jibril bana hun

naghme bhi likhe raat ko pahre bhi diye hain

us jang mein main bhi to barabar se laDa hun

han yun bhi hua hai ki kabhi tujh ko mana kar

main tere tajahul ke 'ewaz ruTh gaya hun

han yun bhi hua hai ki kabhi zaKHm khurach kar

main apne hi ashkon pe kai bar hansa hun

han yun bhi hua hai ki tujhe dhyan mein la kar

main fart-e-parastish mein tujhe bhul gaya hun

han yun bhi hua hai ki tere samne aa kar

qasir hun samajhne se ki main kaun hun kya hun

kyun chand ke mandir mein zamin chhoD ke jaun

beTa hun main jis man ka use puj raha hun

hai 'ijz ki surat na takabbur ki zarurat

achchha hun hazaron se hazaron se bura hun

ho aur to sine mein chhura ghonp ke mar jae

jis karb se main aaj lahu thuk raha hun

aur ek gham-e-zat ke hote hue 'zulfi'

mumkin nahin mujh se ki kisi aur ko chahun