kisi ki chah ka dil ne jab etiraf kiya

kisī kī chaah kā dil ne jab e'tirāf kiyā

ḳhirad ne kyuuñ nahīñ mā'lūm iḳhtilāf kiyā

ḳhudā ne is tarah kalme meñ e'tirāf kiyā

ki apne naam se us naam ko muzāf kiyā

na paa.ī shahr meñ jab apne dil kī yaksūī

to jā ke dasht meñ majnūñ ne e'tikāf kiyā

jis ek hukm se taḳhlīq do jahāñ kī huī

us ek hukm meñ ijmā'-e-nūn-o-kāf kiyā

jalā ke chhoḌā patange ko sham' ne āḳhir

agarche us ne bahut duur se tavāf kiyā

gunah samajh ke gunah kab kiyā hai aadam ne

‘arūz-e-zīst meñ tabdīl ik zihāf kiyā

kahāñ se koh meñ farhād jū-e-shīr aatī

jo kaam tū ne kiyā 'aql ke ḳhilāf kiyā

dam un kā phirtā hai rah kar hamāre pahlū meñ

baḌā qusūr hai dil kā magar mu'āf kiyā

pachhāḌne ke liye aa.e the jo log mujhe

pachhaḌ gaye to mare man kā e'tirāf kiyā

sag-e-najis meñ safā.ī ye kis balā kī hai

jahāñ bhī baiThā hai pahle jagah ko saaf kiyā

ḳhud us kā ghar bhī bahā sab gharoñ ke saath 'adīl'

nadī ke band meñ jis shaḳhs ne shigāf kiyā

kisi ki chah ka dil ne jab e'tiraf kiya

KHirad ne kyun nahin ma'lum iKHtilaf kiya

KHuda ne is tarah kalme mein e'tiraf kiya

ki apne nam se us nam ko muzaf kiya

na pai shahr mein jab apne dil ki yaksui

to ja ke dasht mein majnun ne e'tikaf kiya

jis ek hukm se taKHliq do jahan ki hui

us ek hukm mein ijma'-e-nun-o-kaf kiya

jala ke chhoDa patange ko sham' ne aaKHir

agarche us ne bahut dur se tawaf kiya

gunah samajh ke gunah kab kiya hai aadam ne

‘aruz-e-zist mein tabdil ek zihaf kiya

kahan se koh mein farhad ju-e-shir aati

jo kaam tu ne kiya 'aql ke KHilaf kiya

dam un ka phirta hai rah kar hamare pahlu mein

baDa qusur hai dil ka magar mu'af kiya

pachhaDne ke liye aae the jo log mujhe

pachhaD gaye to mare man ka e'tiraf kiya

sag-e-najis mein safai ye kis bala ki hai

jahan bhi baiTha hai pahle jagah ko saf kiya

KHud us ka ghar bhi baha sab gharon ke sath 'adil'

nadi ke band mein jis shaKHs ne shigaf kiya