KHud se islah-e-shab-o-roz ka wada kar ke

ḳhud se islāh-e-shab-o-roz kā vā'da kar ke

toḌ detā huuñ maiñ har roz irāda kar ke

jaan par qarz chukā kar use ehsāñ jaanā

qad ghaTā baiThā huuñ dā've ko ziyāda kar ke

mujtama' kartā huuñ bikhrā huā paikar apnā

phir bikhar jaatā huuñ ḳhvāhish kā i'āda kar ke

mujh ko diije na qabīle ke gunāhoñ kī sazā

maiñ jamā'at meñ rahā 'azm-e-furādā kar ke

tāb-e-nazzāra na thī tum meñ to ai mere kalīm

yūñhī mat'ūn hue ḳhvāhish-e-sāda kar ke

KHud se islah-e-shab-o-roz ka wa'da kar ke

toD deta hun main har roz irada kar ke

jaan par qarz chuka kar use ehsan jaana

qad ghaTa baiTha hun da'we ko ziyaada kar ke

mujtama' karta hun bikhra hua paikar apna

phir bikhar jata hun KHwahish ka i'ada kar ke

mujh ko dije na qabile ke gunahon ki saza

main jama'at mein raha 'azm-e-furada kar ke

tab-e-nazzara na thi tum mein to ai mere kalim

yunhi mat'un hue KHwahish-e-sada kar ke