hujum-e-gham se nikal kar KHushi ke pas gaya

hujūm-e-ġham se nikal kar ḳhushī ke paas gayā

usī ke dar se uThā phir usī ke paas gayā

ġhazal ne oḌh lī husn-e-bayān kī chādar

ḳhayāl jab bhī tirī sādgī ke paas gayā

bichhā gayā thā mirī raah meñ jo angāre

maiñ nange paaoñ usī aadmī ke paas gayā

zarūratoñ kā safar ḳhatm hī nahīñ hotā

kisī ke paas gayā phir kisī ke paas gayā

'azāb jab bhī kisī shahr par huā nāzil

gunāh dauḌ ke andhī galī ke paas gayā

ḳhudā kā shukr hai laġhzish na paaoñ meñ aa.ī

ḳhudī ke paas gayā be-ḳhudī ke paas gayā

ḳhizāñ ke haath meñ aa.e chaman ke gul-būTe

guloñ kā rang-e-tabassum kalī ke paas gayā

mazāq uḌāne mirī muflisī kā ai 'muztar'

amīr-e-shahr mirī jhoñpaḌī ke paas gayā

hujum-e-gham se nikal kar KHushi ke pas gaya

usi ke dar se uTha phir usi ke pas gaya

ghazal ne oDh li husn-e-bayan ki chadar

KHayal jab bhi teri sadgi ke pas gaya

bichha gaya tha meri rah mein jo angare

main nange paon usi aadmi ke pas gaya

zaruraton ka safar KHatm hi nahin hota

kisi ke pas gaya phir kisi ke pas gaya

'azab jab bhi kisi shahr par hua nazil

gunah dauD ke andhi gali ke pas gaya

KHuda ka shukr hai laghzish na paon mein aai

KHudi ke pas gaya be-KHudi ke pas gaya

KHizan ke hath mein aae chaman ke gul-buTe

gulon ka rang-e-tabassum kali ke pas gaya

mazaq uDane meri muflisi ka ai 'muztar'

amir-e-shahr meri jhonpaDi ke pas gaya