dil mein Thahraw ho aur zehn rawani mein ho

dil meñ Thahrāv ho aur zehn ravānī meñ ho

koī kirdār to aisā bhī kahānī meñ ho

aag ko paanī bujhātā hai to kyā hairat hai

aag dahkāne kī quvvat kisī paanī meñ ho

kaash aulād kā ye dard koī maañ na sahe

us kī tadfīn ho aur ‘ain-javānī meñ ho

ye riyāzat ho ġhazal meñ ki koī ik misra'

ḳhvāb meñ bhī agar aa.e to ravānī meñ ho

zabt ko chhoḌ sakūñ chīḳh sakūñ maiñ bhī kabhī

ye suhūlat to mujhe ashk-fishānī meñ ho

maiñ kisī aur ke hāsil kā talab-gār nahīñ

merī takmīl mire ḳhud ke ma'ānī meñ ho

vo jo uulā kī bhī 'azmat ko baḌhā.e 'qaisar'

baat aisī to koī misra'-e-sānī meñ ho

dil mein Thahraw ho aur zehn rawani mein ho

koi kirdar to aisa bhi kahani mein ho

aag ko pani bujhata hai to kya hairat hai

aag dahkane ki quwwat kisi pani mein ho

kash aulad ka ye dard koi man na sahe

us ki tadfin ho aur ‘ain-jawani mein ho

ye riyazat ho ghazal mein ki koi ek misra'

KHwab mein bhi agar aae to rawani mein ho

zabt ko chhoD sakun chiKH sakun main bhi kabhi

ye suhulat to mujhe ashk-fishani mein ho

main kisi aur ke hasil ka talab-gar nahin

meri takmil mere KHud ke ma'ani mein ho

wo jo ula ki bhi 'azmat ko baDhae 'qaisar'

baat aisi to koi misra'-e-sani mein ho