dil mein jo tere wusat-e-aflak nahin hai

dil meñ jo tire vus'at-e-aflāk nahīñ hai

momin hai magar sāhib-e-idrāk nahīñ hai

ai ahl-e-nazar tū to hai har haal se vāqif

kyuuñ aañkh tirī dīda-e-namnāk nahīñ hai

kyā tujh ko samajh aa.egī furqat kī aziyyat

nādān tirā dil to abhī chaak nahīñ hai

har chiiz gavārā hai magar zahr-e-raqābat

is zahr kā pyāre koī tiryāk nahīñ hai

ā'sāb pe logoñ ke hai ab ḳhauf kā ġhalba

sab kuchh hai magar lahja-e-bebāk nahīñ hai

ab kaun nikālegā bhañvar se mirī kashtī

tū māhir-e-guftār hai tairāk nahīñ hai

'mushtāq' kahāñ pahuñche tire fikr ko 'iqbāl'

jazba to vahī hai vale idrāk nahīñ hai

dil mein jo tere wus'at-e-aflak nahin hai

momin hai magar sahib-e-idrak nahin hai

ai ahl-e-nazar tu to hai har haal se waqif

kyun aankh teri dida-e-namnak nahin hai

kya tujh ko samajh aaegi furqat ki aziyyat

nadan tera dil to abhi chaak nahin hai

har chiz gawara hai magar zahr-e-raqabat

is zahr ka pyare koi tiryak nahin hai

aa'sab pe logon ke hai ab KHauf ka ghalba

sab kuchh hai magar lahja-e-bebak nahin hai

ab kaun nikalega bhanwar se meri kashti

tu mahir-e-guftar hai tairak nahin hai

'mushtaq' kahan pahunche tere fikr ko 'iqbaal'

jazba to wahi hai wale idrak nahin hai