tumko shohrat ho mubarak hamein ruswa na karo

tum ko shohrat ho mubārak hameñ rusvā na karo

ḳhud bhī bik jāoge ik roz ye saudā na karo

shauq se parda karo parda hai vājib lekin

merī qismat ke añdheroñ meñ izāfa na karo

ham pe āshufta-nigāhī kī ye tohmat kyā ḳhuub

tum bhī duzdīda-nazar se hameñ dekhā na karo

chuum lene do ruḳh-e-yār ko jī bhar ke hameñ

zindagī pyaar hai tum pyaar se rokā na karo

koshisheñ karne se hālāt badal jaate haiñ

ḳhud bigāḌī huī taqdīr kā shikvā na karo

bandagī hī se to hai banda-navāzī un kī

baa'z nādān ye kahte haiñ ki sajda na karo

'arsh par ḳhāk-nashīnoñ kā baserā tauba

jo na puurī ho kabhī aisī tamannā na karo

husn ko tum ne ḳhudā samjhā hai lekin ai 'munīr'

ḳhud banā.e hue mā'būd kī puujā na karo

tum ko shohrat ho mubarak hamein ruswa na karo

KHud bhi bik jaoge ek roz ye sauda na karo

shauq se parda karo parda hai wajib lekin

meri qismat ke andheron mein izafa na karo

hum pe aashufta-nigahi ki ye tohmat kya KHub

tum bhi duzdida-nazar se hamein dekha na karo

chum lene do ruKH-e-yar ko ji bhar ke hamein

zindagi pyar hai tum pyar se roka na karo

koshishen karne se haalat badal jate hain

KHud bigaDi hui taqdir ka shikwa na karo

bandagi hi se to hai banda-nawazi un ki

ba'z nadan ye kahte hain ki sajda na karo

'arsh par KHak-nashinon ka basera tauba

jo na puri ho kabhi aisi tamanna na karo

husn ko tum ne KHuda samjha hai lekin ai 'munir'

KHud banae hue ma'bud ki puja na karo