toDna TuTe hue dil ka bura hota hai
toḌnā TuuTe hue dil kā burā hotā hai
koī bhī jis kā nahīñ us kā ḳhudā hotā hai
iltijāoñ se masarrat mile manzūr nahīñ
kis kā māñgī huī daulat se bhalā hotā hai
shukr hai ai mire hamdard 'ināyat kā tirī
pursish-e-hāl se ab ranj sivā hotā hai
aadmī jang kare laakh mashiyyat se magar
vo nahīñ miltā jo qismat se sivā hotā hai
har qadam ziist kī ālām-zada rāhoñ meñ
dil laraztā hai ki ab dekhiye kyā hotā hai
log nā-haq kisī majbūr ko kahte haiñ burā
aadmī achchhe haiñ sab vaqt burā hotā hai
kyuuñ 'munīr' apnī tabāhī kā ye shikva kaisā
jitnā taqdīr meñ likkhā hai adā hotā hai
toDna TuTe hue dil ka bura hota hai
koi bhi jis ka nahin us ka KHuda hota hai
iltijaon se masarrat mile manzur nahin
kis ka mangi hui daulat se bhala hota hai
shukr hai ai mere hamdard 'inayat ka teri
pursish-e-haal se ab ranj siwa hota hai
aadmi jang kare lakh mashiyyat se magar
wo nahin milta jo qismat se siwa hota hai
har qadam zist ki aalam-zada rahon mein
dil larazta hai ki ab dekhiye kya hota hai
log na-haq kisi majbur ko kahte hain bura
aadmi achchhe hain sab waqt bura hota hai
kyun 'munir' apni tabahi ka ye shikwa kaisa
jitna taqdir mein likkha hai ada hota hai
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
