tarashi hai mere hathon ne ek murat jo patthar ki

tarāshī hai mire hāthoñ ne ik mūrat jo patthar kī

ki jis ko dekh kar sharmā ga.ī taḳhlīq aazar kī

ḳhudā hī jaane un kī aañkh se kyuuñ ashk bah nikle

jo hālat pūchhne aa.e the mere qalb-e-muztar kī

kisī ke vā'da-e-fardā kā mujh par ye asar Thahrā

ginā kartā huuñ pahroñ baiTh kar lahreñ samundar kī

ḳhudā shāhid ki apnī chaar din kī zindagānī meñ

na taḳht-o-tāj kī ḳhvāhish na hasrat hī rahī zar kī

'ajab turfa tamāshā hai ki gulshan us ne hī luuTā

hifāzat kar rahā thā gulsitāñ meñ jo ġhul-e-tar kī

isī se tum ko ho jā.egā andāza ki maiñ kyā huuñ

mire qātil ne ab qīmat lagā.ī hai mire sar kī

hai apnā 'azm hī ab ham-safar aur rahnumā 'kāvish'

zarūrat ham-safar kī hai na mujh ko aaj rahbar kī

tarashi hai mere hathon ne ek murat jo patthar ki

ki jis ko dekh kar sharma gai taKHliq aazar ki

KHuda hi jaane un ki aankh se kyun ashk bah nikle

jo haalat puchhne aae the mere qalb-e-muztar ki

kisi ke wa'da-e-farda ka mujh par ye asar Thahra

gina karta hun pahron baiTh kar lahren samundar ki

KHuda shahid ki apni chaar din ki zindagani mein

na taKHt-o-taj ki KHwahish na hasrat hi rahi zar ki

'ajab turfa tamasha hai ki gulshan us ne hi luTa

hifazat kar raha tha gulsitan mein jo ghul-e-tar ki

isi se tum ko ho jaega andaza ki main kya hun

mere qatil ne ab qimat lagai hai mere sar ki

hai apna 'azm hi ab ham-safar aur rahnuma 'kawish'

zarurat ham-safar ki hai na mujh ko aaj rahbar ki