surur ijz ka hai wasf-e-KHud-sari ka nahin

surūr 'ijz kā hai vasf-e-ḳhud-sarī kā nahīñ

azal se mujh meñ taqāzā barābarī kā nahīñ

hamāre she'r khuleñge to jaan jāoge

hamārā karb faqat ek hī sadī kā nahīñ

ye kis jahān-e-mazāfāt meñ rihā.ish hai

jahāñ pe koī musāfir mirī galī kā nahīñ

munāfiqat ke libāde shanāḳht kar liije

koī nabī kā kahāñ hai agar 'alī kā nahīñ

'ajīb dukh hai ki sab ne bujhā diye haiñ charāġh

savāl sirf mirī zard raushnī kā nahīñ

tire liye hī azal se bachā ke rakkhā hai

zamīn-e-dil pe tasallut abhī kisī kā nahīñ

tirī taraf se tavajjoh rahe bahut hai mujhe

mujhe malāl kamī yā ziyādatī kā nahīñ

hamārā zarf kisī par 'ayāñ nahīñ hotā

ki ye mizāj samundar kā hai nadī kā nahīñ

surur 'ijz ka hai wasf-e-KHud-sari ka nahin

azal se mujh mein taqaza barabari ka nahin

hamare she'r khulenge to jaan jaoge

hamara karb faqat ek hi sadi ka nahin

ye kis jahan-e-mazafat mein rihaish hai

jahan pe koi musafir meri gali ka nahin

munafiqat ke libaade shanaKHt kar lije

koi nabi ka kahan hai agar 'ali ka nahin

'ajib dukh hai ki sab ne bujha diye hain charagh

sawal sirf meri zard raushni ka nahin

tere liye hi azal se bacha ke rakkha hai

zamin-e-dil pe tasallut abhi kisi ka nahin

teri taraf se tawajjoh rahe bahut hai mujhe

mujhe malal kami ya ziyaadati ka nahin

hamara zarf kisi par 'ayan nahin hota

ki ye mizaj samundar ka hai nadi ka nahin