na sim-o-zar se ye chola badal faqirana

na sīm-o-zar se ye cholā badal faqīrāna

tū aġhniyā se koī chaal chal faqīrāna

use batāo ki jogī kisī kā miit nahīñ

use sunāo ye zarbul-masal faqīrāna

saḳhī mile jo kahīñ par to aañkh nīchī kar

baḳhīl de jo dikhā.ī uchhal faqīrāna

koī ḳhayāl koī yaad apne saath na le

hai nā-umīd to ghar se nikal faqīrāna

rah-e-talab meñ milī 'qais' ke sivā kis ko

musāfirāna javānī ajal faqīrāna

savāl karte haiñ lekin baḌe ġhurūr ke saath

mizāj un kā bhī hai āj-kal faqīrāna

karā.eñ apnī ziyārat hī auliyā kī tarah

milā jo karte the pahle-pahal faqīrāna

hamāre dost ki kursī-nashīñ hue 'sayyad'

unhīñ ko ham ne sunā.ī ġhazal faqīrāna

na sim-o-zar se ye chola badal faqirana

tu aghniya se koi chaal chal faqirana

use batao ki jogi kisi ka mit nahin

use sunao ye zarbul-masal faqirana

saKHi mile jo kahin par to aankh nichi kar

baKHil de jo dikhai uchhal faqirana

koi KHayal koi yaad apne sath na le

hai na-umid to ghar se nikal faqirana

rah-e-talab mein mili 'qais' ke siwa kis ko

musafirana jawani ajal faqirana

sawal karte hain lekin baDe ghurur ke sath

mizaj un ka bhi hai aaj-kal faqirana

karaen apni ziyarat hi auliya ki tarah

mila jo karte the pahle-pahal faqirana

hamare dost ki kursi-nashin hue 'sayyad'

unhin ko hum ne sunai ghazal faqirana