kuchh kam nahin the hum bhi kisi etibar se

kuchh kam nahīñ the ham bhī kisī e'tibār se

ḳham khā gaye haiñ apnī shikastoñ ke baar se

kis ko hai ab dimāġh-e-tamannā-e-rang-o-bū

nādim haiñ dil ke jazba-e-be-iḳhtiyār se

koī sukūn pā na sake jis kī chhāñv meñ

kyā fā.eda hai us shajar-e-sāya-dār se

kundan bane haiñ ātish-e-qalb-o-jigar se ham

behtar hai apnā ġham tarab-e-musta'ār se

be-mehr mausamoñ ke talātum meñ ghir gayā

dil ko bachā ke laa.e the us rahguzār se

shāyad ki tīrgī chhaTe shāyad ki pau phaTe

hālāt ab hue to haiñ kuchh sāzgār se

'fāriġh' dil-e-figār gulistāñ se kam nahīñ

nisbat hai ek guuna hameñ gul-bahār se

kuchh kam nahin the hum bhi kisi e'tibar se

KHam kha gaye hain apni shikaston ke bar se

kis ko hai ab dimagh-e-tamanna-e-rang-o-bu

nadim hain dil ke jazba-e-be-iKHtiyar se

koi sukun pa na sake jis ki chhanw mein

kya faeda hai us shajar-e-saya-dar se

kundan bane hain aatish-e-qalb-o-jigar se hum

behtar hai apna gham tarab-e-musta'ar se

be-mehr mausamon ke talatum mein ghir gaya

dil ko bacha ke lae the us rahguzar se

shayad ki tirgi chhaTe shayad ki pau phaTe

haalat ab hue to hain kuchh sazgar se

'farigh' dil-e-figar gulistan se kam nahin

nisbat hai ek guna hamein gul-bahaar se