jo kabhi kisi se milna to yun etidal rakhna

jo kabhī kisī se milnā to yuuñ e'tidāl rakhnā

na hadoñ se paar jaanā na koī malāl rakhnā

kahīñ be-libās ham haiñ kahīñ be-libās tum ho

hameñ aa.ina dikhānā to zarā ḳhayāl rakhnā

vo jo chehra-e-haqīqat hai chhupā huā diloñ meñ

use be-naqāb karnā na pas-e-jamāl rakhnā

ye chamak-damak hai faanī ye ruteñ haiñ ānī-jānī

kabhī ḳhud pe naaz ho to nazar-e-kamāl rakhnā

jo 'urūj ye milā hai bhalā kab talak rahegā

jo bulandiyoñ pe jaanā to qadam sañbhāl rakhnā

jo karegā is jahāñ meñ vo bharegā us jahāñ meñ

jo 'ḳhumār' dil dukhā.e na koī malāl rakhnā

jo kabhi kisi se milna to yun e'tidal rakhna

na hadon se par jaana na koi malal rakhna

kahin be-libas hum hain kahin be-libas tum ho

hamein aaina dikhana to zara KHayal rakhna

wo jo chehra-e-haqiqat hai chhupa hua dilon mein

use be-naqab karna na pas-e-jamal rakhna

ye chamak-damak hai fani ye ruten hain aani-jaani

kabhi KHud pe naz ho to nazar-e-kamal rakhna

jo 'uruj ye mila hai bhala kab talak rahega

jo bulandiyon pe jaana to qadam sanbhaal rakhna

jo karega is jahan mein wo bharega us jahan mein

jo 'KHumar' dil dukhae na koi malal rakhna